sia teh ujang

ujang, ema teh reuwas barang teurang kumaha kalakuan ujang di kantor.
naha atuh ujang teh jadi kitu?

padahal ema sareng apa mah kuat ka suku dijieun hulu, hulu dijieun suku sangkan maneh teh bisa jadi sarjana.
sangkan maneh teh bisa digawe di kantor.

tapi geuning ujang teh ayeuna mah jadi kitu....
ema mah isin...
isin pisan ningali kalakuan ujang di kantor teh,
naha ujang bet jadi nyapir ka deungeun-deungeun?

naha ujang teh jadi nyapir artos "administrasi" ka jalma teu warawuh?
pan ujang teh sarjana lain?

ema teh mani sagala ngirit kanggo ngabiayaan sakola ujang...
da ema mah hayang ujang teh jadi jalma nu boga harga diri,
nu bisa dihargaan ku batur...
nu gawena di kantor,
lain jadi tukang ngarambet kawas ema...

tapi geuning ujang teh naha kitu?
ujang teh sarjana, gawe di kantor, jadi pagawe pamarentah,
tapi geuning teu beda we jeung tukang nyapir di jalan,
menta-an duit ka deungeun-deungeun,

nu nyapir di jalan mah puguh da manehna teu boga pacabakan,
na ari ujang naha nyapir di kantor?
lin ujang teh digajih ku pamarentah?
lin ujang teh digawena ge make saragam pamarentah?
naha atuh ujang teh jadi tukang nyapir?


era ema mah....
hanjakal ema nyakolakeun ujang jadi sarjana,
da geuning ujang teh kalah nyapir,
meureun lamun bareto ema nurut ka apa,
nyakolakeun maneh teh ngan semet SD wungkul,
meureun ujang teh moal jadi tukang nyapir,
meureun ujang teh milu ngarambet jeung ema.....

ujang, ema mah teu rido ujang jadi tukang nyapir,
ema mah leuwih rido mun ujang teh jadi tukang ngarambet....

eta deuih kumaha maraban budak make duit tina nyapir?
naha halal kitu?
sing karunya ka barudak....
ujang teh tega kitu maraban budak sorangan ku artos haram?

ujang, hirup di dunya mah ngan saukur liwat...
eta kumaha tanggung jawab na ka Gusti ALLOH?

duh Gusti....
naon atuh kalepatan kuring teh...
naha anak kuring jadi tukang nyapir....



tah ujang, ieu sadayana barang2 pamasihan ujang ku ema dipulangkeun,
da ema mah alim dipasihan barang meunang nyapir...
da ema mah ngadidik ujang teh sangkan ujang jadi jalma nu boga harga diri...
jadi jalma nu ngukur kana kamampuan diri...

ema mah teu rumasa ngadidik ujang jadi tukang nyapir...

ujang mah ayeuna teu kedah seueur emutan ka ema...
teu kedah ngintunan artos ka ema....

da ari ukur jang dahar mah, ema masih keneh kuat kuli ngarambet...
da ema mah tos biasa malarat....

ema mah teu teurang isukan, teu teurang pageto...
da ema mah tos sepuh...



baca juga:
**cau
**sia teh ujang
**paraji
**hanjakal
**urang sunda
**bodor sunda
**pantun lebaran dina basa sunda
**sisindiran 1
**sisindiran 2
**sisindiran 3
**sisindiran 4
**sisindiran 5